Lánaskilyrði
Þar sem við erum lítill sparisjóður verðum við að byrja hægt og rólega að lána til að takmarka ákveðið aðgengi og lágmarka áhættu. Þó að þú fáir ekki lán hjá indó í dag, þýðir það alls ekki að þú munir aldrei geta fengið lán hjá indó. Við munum reglulega endurmeta lánaskilyrðin.
Eins og er, þarftu að uppfylla þessi viðmið til að fá yfirdrátt
- 25 ára eða eldri
Við viljum byrja á því að hafa stífari aldurskröfur. Þau sem eru eldri eru mun líklegri til að standa í skilum. Við munum mögulega breyta þessu viðmiði í náinni framtíð.
- Lögheimili á Íslandi
Við viljum byrja á því að hafa kröfur um lögheimili á Íslandi. Þau sem hafa lögheimili á Íslandi eru líklegri til að standa í skilum en þau sem hafa lögheimili erlendis. Við munum líklega ekki breyta þessu skilyrði fljótlega.
- Lánshæfismat hjá Creditinfo
Þú þarft að vera með B2 eða hærra í lánshæfismat hjá Creditinfo. Við vitum að þetta eru stífar kröfur og munum við sífellt endurskoða viðmiðið.
- Vera í vinnu
Til að fá yfirdrátt þarftu að fá laun. Þegar þú sækir um yfirdrátt hjá indó biðjum við um samþykki þitt að fá staðfestingu hjá Skattinum að þú sért í launaðri vinnu, a.m.k. með 250.000 kr.
- Nota indó í 6 mánuði
Við skilgreinum "að nota indó" sem a.m.k. 10 færslur í mánuði. Við munum líklega aldrei gera lán aðgengileg strax um leið og fólk stofnar reikning í indó - en við vitum að 6 mánuðir er langur tími. Í raun erum við að byrja á 6 mánuðum til að takmarka aðgengi að lánum til að byrja að lána hægt og rólega. Við vonumst til að geta breytt þessum kröfum í styttri tíma í náinni framtíð.
- Aldur kennitölu 36 mánaða eða eldri
Þau sem hafa íslenska kennitölu í þennan tíma eru líklegri að hafa skotið rótum hér og eru því mun líklegri til að standa í skilum en þau sem eru nýflutt til landsins. Við munum mögulega breyta þessu viðmiði í náinni framtíð.
- Lánasaga
Ef þú hefur fengið lán áður hjá indó þarftu að hafa staðið í skilum til að fá yfirdrátt.
Ef þú hefur áður fengið fyrirframgreidd laun og ekki greitt þau til baka á réttum tíma eða yfirdráttur hefur farið í vanskil áttu ekki rétt á yfirdrætti.
Eins og er, þarftu að uppfylla þessi viðmið til þess að fá fyrirframgreidd laun
- Launin hjá indó
Við erum svo spennt að geta boðið ókeypis lán fyrir indóana okkar. Til að geta fengið fyrirfram, þarftu að hafa launin þín hjá indó síðastliðna 3 mánuði, að lágmarki 150.000 kr. Það er vegna þess að við treystum okkur til að bjóða lítið, ókeypis lán ef við vitum að við fáum það greitt innan nokkurra daga. Með því að tengja lánið við launin fáum við peninginn til baka sjálfkrafa og indóar þurfa ekki að taka dýrt lán ef það vantar pening fyrir síðustu matarkörfunni í lok mánaðar.
- Lögheimili á Íslandi
Við viljum byrja á því að hafa kröfur um lögheimili á Íslandi. Við munum líklega ekki breyta þessu skilyrði fljótlega.
- 25 ára eða eldri
Við viljum byrja á því að hafa stífari aldurskröfur. Þau sem eru eldri eru mun líklegri til að standa í skilum. Við munum mögulega breyta þessu viðmiði í náinni framtíð.
- Aldur kennitölu 36 mánaða eða eldri
Þau sem hafa íslenska kennitölu í þennan tíma eru líklegri að hafa skotið rótum hér og eru því mun líklegri til að standa í skilum en þau sem eru nýflutt til landsins. Við munum mögulega breyta þessu viðmiði í náinni framtíð.
- Lánasaga
Ef þú hefur fengið lán áður hjá indó þarftu að hafa staðið í skilum til að fá fyrirframgreidd laun.
Ef þú hefur áður fengið fyrirframgreidd laun og ekki greitt þau til baka á réttum tíma eða yfirdráttur hefur farið í vanskil áttu ekki rétt á fyrirframgreiddum launum. Þú getur fengið fyrirfram þótt þú sért með virkan yfirdrátt.