Skilmálar á mannamáli

Skilmálar sem fólk skilur

Þó við reynum að taka okkur sjálf ekki of alvarlega, þá tökum við það mjög alvarlega að passa peningana þína. Þess vegna gilda alls konar reglur um hvað við megum, og megum ekki, gera. Líka hvað þú átt að passa upp á og hvaða rétt þú hefur ef okkur verður eitthvað á í messunni (sem við ætlum auðvitað að koma í veg fyrir eins og við mögulega getum).

Hérna ætlum við að segja þér það helsta sem er í skilmálum okkar, og það væri auðvitað gott ef þú læsir þá alla.

Að vera með reikning hjá indó

Þegar þú vilt stofna reikning, þá þurfum við að spyrja þig nokkurra spurninga sem kunna að hljóma undarlega. Við gerum það, hins vegar, til að passa upp á að enginn sé að nota þjónustuna okkar í ólöglegum tilgangi, og við höfum engan áhuga á að fólk geti notað reikninga indó til peningaþvættis eða til að fjármagna glæpi. Þess vegna spyrjum við alla sem vilja koma til okkar, þetta er ekkert persónulegt.

Þegar búið er að stofna reikning er allt klárt. Við erum svo glöð að sjá þig í indó! Þá færðu kort og getur byrjað að nota það í símanum þínum alveg um leið ef þú ert með Apple Pay eða Google Pay.

Að nota indókortið þitt

Þú þarft auðvitað að passa að enginn komist í kortið þitt eða viti PIN númerið þitt, þú hjálpar okkur þannig að passa peningana þína.

Við rukkum þig ekki fyrir að nota kortið, en því miður er það þannig að ef þú notar kortið t.d. í hraðbönkum eða í útlöndum þá gætu þeir sem sjá um hraðbankana eða erlendu greiðslurnar viljað rukka þig um einhver gjöld. Okkur finnst það ömurlegt, en getum ekkert gert í því (alla vega ennþá!).

Ef þú heldur að einhver hafi komist í kortaupplýsingarnar þínar skaltu byrja á að frysta kortið þitt í appinu og láta okkur svo vita, og við leysum málið.

Þú þarft auðvitað að passa að þegar þú notar kortið, að það sé næg innstæða á reikningnum.

Hvað ef eitthvað breytist?

Stundum þurfum við að breyta hlutunum, eins og t.d. vöxtum og svona. Ef breytingin er til hagsbóta fyrir þig, þá breytum við strax, en ef hún er ekki jafn skemmtileg fyrir þig, þá látum við þig vita með 2ja mánaða fyrirvara (og af hverju 2 mánuðir? Jú, þannig eru lögin).

Ef við gerum mistök

Ef við gerum mistök, þá munum gera allt til að bæta fyrir þau og passa að þau endurtaki sig ekki. Ef þér finnst við ekki hafa brugðist rétt við einhverju sem þér fannst fara úrskeiðis, þá getur þú alltaf beðið nefnd hjá Fjármálaeftirlitinu, svokallaða Úrskurðarnefnd um viðskipti við fjármálafyrirtæki, um að ganga í málið og kanna hvort við höfum verið í ruglinu.

Við pössum upplýsingarnar þínar vel

Sparisjóðurinn okkar þarf að safna saman alls konar upplýsingum um þig, til að geta veitt þér frábæra þjónustu. Allt eru það upplýsingar sem við þurfum til að passa að kerfin okkar virki rétt, og að peningunum þínum líði sem allra best og þegar þú notar þá, að þeir fari á rétta staði og svona. Við lofum því að passa upp á þessar upplýsingar rosalega vel og munum alls ekki láta einhverja aðra fá þessar upplýsingar í öðrum tilgangi en að passa að allt virki rétt, nema þú leyfir það sérstaklega eða þegar lögin hreinlega skipa okkur að gera það.

Apple Pay og Google Pay

Ef þú ert að nota Apple Pay eða Google Pay, þá virkar það alveg eins og að borga með gamaldags korti, nema það á að vera öruggara og þægilegra. Til viðbótar við skilmála okkar, þá er líka sterkur leikur að kynna sér skilmála Apple eða Google (hvort stýrikerfið sem er á símanum þínum) og renna yfir skilmála á forritunum sem geymir kortið þitt. Apple og Google eru jú að safna ákveðnum upplýsingum úr símtækinu þínu til að bæta sína þjónustu, og það er þeirra að ákveða hvað það er og slíkt, en að sjálfsögðu allt í fullu samræmi við lög og reglur.